Inngildingarvísitala fyrir íslenska vinnumarkaðinn verður kynnt í fyrsta sinn á Mannauðsdeginum 2024, þann 4. október. Vísitalan er afrakstur samstarfs Mannauðs og Öldu. Rúmlega 80 fyrirtæki, með samtals um 20.000 starfsmenn, tóku þátt í könnuninni sem mælir upplifun starfsfólks af vinnustaðamenningu. Könnunin skoðar sérstaklega hvernig upplifanir dreifast eftir ólíkum félagslegum hópum, svo sem eftir kyni, uppruna, kynþætti og fötlun. Könnunin var unnin af sérfræðingum Öldu í samstarfi við Háskóla Íslands. Markmið rannsóknarinnar er að varpa ljósi á stöðu inngildingar á íslenskum vinnustöðum.

Inngildingarvísitalan mun veita íslenskum fyrirtækjum og stofnunum nýtt tól til að mæla og bæta inngildingu á vinnustöðum sínum. Þau sem tóku þátt fá sitt sértæka Inngildingarskor, sem þau geta nýtt til að bæta vinnustaðamenningu sína. Á Mannauðsdeginum verður einungis kynnt heildarskor fyrir Ísland.